டிகேஸ்வரர் திருக்கோவில்

கோள்பாந்த்ரே, தாலுகா: தாபோலி, மாவட்டம்: ரத்னகிரி

தாபோலி தாலுகாவில் உள்ள கோள்பாந்த்ரே என்னும் கிராமத்தில் டிகேஸ்வர மகாதேவரின் புராதனமான திருக்கோவில் அமைந்துள்ளது. சுற்றியுள்ள கிராம மக்களுக்கு இந்த டிகேஸ்வரர் மீது அபாரமான நம்பிக்கை உள்ளது. இப்பகுதியில் காவல்துறையிடமோ நீதிமன்றத்திற்கோ செல்லவேண்டிய அவசியம் பொதுவாக ஏற்படுவதில்லை என்றும், இங்கு கிராமக் காவல் தெய்வமான டிகேஸ்வரரின் சட்டமே செல்லுபடியாகும் என்றும் கூறப்படுகிறது! இப்பகுதியில் யாராவது ஒருவரை ஏமாற்றினாலோ அல்லது துன்புறுத்தினாலோ, ‘இனி டிகேஸ்வரருக்கு தேங்காய் நேர்ந்துகொள்வேன்’ என்று பாதிக்கப்பட்டவர் ஒரு வார்த்தை சொன்னாலே போதும், எதிரில் இருப்பவர் அஞ்சி நடுங்குவார். அவரது நடத்தை உடனடியாகச் சரியாகவிடும். ஏனெனில் அவ்வாறு செய்யாவிட்டால் டிகேஸ்வரர் நிச்சயம் தங்களைத் தண்டிப்பார் என்பது அவருக்குத் தெரியும்!

இக்கோவிலின் தலபுராணம் என்னவென்றால், கோள்பாந்த்ரே கிராமத்தில் தற்போது கோவில் அமைந்துள்ள இடத்தில் முன்பு நெல் வயல் இருந்தது. தாபோல் பகுதியைச் சேர்ந்த திரு. லோகண்டே என்பவர் தனது நிலத்தை உழுதுகொண்டிருந்தபோது, கலப்பையின் கொழு ஒரு மண் மேட்டில் சிக்கிக்கொண்டது. கலப்பையின் கொழு சிக்கிய இடத்தில் இருந்து திடீரென்று நீர் பெருகி வழிந்து, ஊர்க் குளத்தை அடைந்தது. அன்றிலிருந்து அக்குளத்தின் நீர் என்றுமே வற்றியதில்லை. கலப்பையின் கொழு சிக்கி நீர் பெருக்கெடுத்த அந்த மண் மேட்டிலிருந்து ஒரு சிவலிங்கம் தோன்றி வெளிப்பட்டது. சில நாட்களில் கிராம மக்கள் சாஸ்திரோக்தமான முறையில் அந்த சிவலிங்கத்தை அங்கே பிரதிஷ்டை செய்தனர். இந்த சிவலிங்கம் மண் மேட்டிலிருந்து வெளிப்பட்டதால், இப் பெருமானுக்கு ‘டிகேஸ்வரர்’ (ढिगेश्वर) என்று பெயர் வந்தது. காலப்போக்கில் அது மருவி ‘டிகேஸ்வரர்’ (डिगेश्वर) என வழங்கலாயிற்று. இக்கோவிலுக்கு 1874 ஆம் ஆண்டு ஒரு சாசனம் (ஸனத்) வழங்கப்பட்டது; அதாவது அதற்கு முன்பிருந்தே மகாதேவர் இங்கு எழுந்தருளியுள்ளார்.

தாபோலியிலிருந்து சடவலே வழியாக கோள்பாந்த்ரே கிராமத்திற்குச் செல்லும்போது, சாலையின் இடதுபுறத்தில் டிகேஸ்வர மகாதேவர் கோவில் அமைந்துள்ளது. ஜில்லா பரிஷத் தொடக்கப் பள்ளியின் அருகில் அமைந்துள்ள இக்கோவிலின் முன் பரந்த முற்றம் உள்ளது. இம்முற்றத்தில் இருந்து ஆறு படிகள் ஏறி கோவிலின் நுழைவாயிலை அடையலாம். முதன்மை திருக்கோவில் நுழைவாயிலின் முன் ஒரு தீபஸ்தம்பமும், கோவிலின் உயரத்திற்கு ஈடான கொடிமரமும் (த்வஜஸ்தம்பம்) உள்ளன. சுமார் இரண்டு முதல் இரண்டரை அடி உயரமுள்ள தளத்தின் (அதிஷ்டானம்) மீது இக்கோவில் அமைக்கப்பட்டிருக்கிறது. சபாமண்டபம், அந்தராளம் மற்றும் கர்ப்பகிரகம் என்ற அமைப்பில் கோவில் நிர்மாணிக்கப்பட்டுள்ளது. 2015 ஆம் ஆண்டு செய்யப்பட்ட திருப்பணிக்கு (ஜீரணோத்தாரணம்) பிறகே கோவில் தற்போதைய வடிவத்தைப் பெற்றுள்ளது. தீபஸ்தம்பத்தின் அருகே ஐந்து முதல் ஆறு படிகள் ஏறி, வளைவு போன்ற கோவில் நுழைவாயில் வழியாக சபாமண்டபத்திற்குள் செல்லலாம். இங்குள்ள சபாமண்டபம் அர்த்தமண்டப அமைப்பைக் கொண்டது; சுற்றிலும் பக்தர்கள் அமர்வதற்கான திண்ணை போன்ற இருக்கைகள் உள்ளன. இச்சபாமண்டபத்திலேயே பிரகாரப் பாதையைத் தாண்டி அந்தராளமும் கர்ப்பகிரகமும் அமைந்துள்ளன. இங்குள்ள அந்தராளம் சற்று உயரமானது; அதில் கர்ப்பகிரக நுழைவாயிலின் எதிரே ஒரு மேடையில் ஏகசிலையிலான (ஒரே கல்லால் ஆன) நந்தி சிலை உள்ளது. கர்ப்பகிரக நுழைவுச் சட்டத்தின் வலதுபுறம் இலட்சுமி நாராயணரும், இடதுபுற மாடக் குழியில் கணபதியும் எழுந்தருளியுள்ளனர். கணபதி சிலையின் முன்புறம் ஒரு சிறிய சிவலிங்கம் உள்ளது. டிகேஸ்வரரின் கருவறைக்குள் குரூவ் (பூசாரிகள்) சமூகத்தினருக்கு மட்டுமே அனுமதியிருப்பதால், வருகை தரும் பக்தர்கள் வழிபாடுகளும் அபிஷேகமும் செய்வதற்காக இந்தச் சிவலிங்கம் இங்கு வைக்கப்பட்டுள்ளதாகக் கூறப்படுகிறது. நிலைக்கதவுச் சட்டத்தில் மரத்திலான அழகான வேலைப்பாடுகள் காணப்படுகின்றன. கருவறையில் ஏகசிலையிலான சிவலிங்கம் வீற்றிருக்க, அதன் மீது ஐந்து தலை நாகம் (சேஷன்) குடை பிடித்துள்ளது. கர்ப்பகிரகத்தின் மீது அமைந்துள்ள சிகரம் தனிச்சிறப்பு மிக்கது; அதில் பல தேவதைகளின் செதுக்கப்பட்ட சிற்பங்களும் சிறிய சிறிய கலசங்களும் பொறிக்கப்பட்டுள்ளன.

இக்கோவிலின் அருகில் உள்ள மற்ற இரண்டு கோவில்களில் கணபதி, நந்தி, சண்டிகா தேவி, கோடேஸ்வரி தேவி, ஜோலாய் தேவி, காளகாய் தேவி, பைரி பவானி தேவி, வாக்ஜாய் தேவி, மானாய் தேவி ஆகிய தெய்வங்களின் திருமேனிகள் உள்ளன. டிகேஸ்வரரின் மகா சிவராத்திரி முதன்மை திருவிழாவுடன், இத்தெய்வங்களுக்கும் பல்வேறு உற்சவங்கள் இங்கு கோலாகலமாகக் கொண்டாடப்படுகின்றன. மகா சிவராத்திரி விழா இங்கு மூன்று நாட்கள் கொண்டாடப்படுகிறது. இக்காலத்தில் டிகேஸ்வரருக்குப் பால் அபிஷேகம் செய்யப்படுகிறது. நாள்முழுவதும் பஜன், கீர்த்தனை போன்ற நிகழ்ச்சிகள் நடைபெறும். நவராத்திரியின் போது சண்டிகா தேவி, கோடேஸ்வரி தேவி, ஜோலாய் தேவி, காளகாய் தேவி, பைரி பவானி தேவி, வாக்ஜாய் தேவி, மானாய் தேவி ஆகிய அம்மன்களின் விழாக்கள் கொண்டாடப்படுகின்றன. திருவிழா காலங்களில் இங்குள்ள அனைத்து மூர்த்திகளுக்கும் வெள்ளி கவசங்கள் சாத்தப்படுகின்றன.

இங்கு ஹோலிப் பண்டிகை ஐந்து நாட்கள் கொண்டாடப்படுகிறது. இக்காலத்தில் இறைவனின் பல்லாக்கு ‘சஹாணே’ (உற்சவ மேடை) மீது வைக்கப்படுகிறது. பின்னர் ஐந்தாம் நாளில் பல்லாக்கு மீண்டும் கோவிலை அடைகிறது. அந்நேரத்தில் மங்களப் பொருட்கள் (ஓடி) சமர்ப்பிக்கவும், நேர்த்திக்கடன் செலுத்தவும் சுற்றியுள்ள பகுதிகளைச் சேர்ந்த ஏராளமான பக்தர்கள் வருகின்றனர். மூன்று ஆண்டுகளுக்கு ஒருமுறை வரும் அதிக மாதத்தில், கோள்பாந்த்ரே கோடேஸ்வரி தேவி மற்றும் சடவலி கோடேஸ்வரி தேவியின் பல்லாக்குகள் கோள்பாந்த்ரே ஆற்றில் ஒன்றையொன்று சந்திக்கின்றன. சகோதரிகளான இவ்விரு தேவியரின் இந்தச் சந்திப்பு வைபவத்தைக் காண ஆயிரக்கணக்கான பக்தர்கள் திரள்கின்றனர். இங்குள்ள அனைத்துத் திருவிழாக்களையும் கோள்பாந்த்ரே கிராமத்தின் பன்னிரண்டு சிற்றூர்களைச் சேர்ந்த மக்கள் ஒன்றுசேர்ந்து நடத்துகின்றனர்.

பயனுள்ள தகவல்கள்:

• தாபோலியிலிருந்து 12 கி.மீ., ரத்னகிரியிலிருந்து 141 கி.மீ. தொலைவில்
• தாபோலியிலிருந்து அரசுப் பேருந்து (ST) வசதி உண்டு
• தனியார் வாகனங்கள் நேரடியாகக் கோவில் வரை செல்லலாம்
• சுற்றியுள்ள பகுதியில் தங்குவதற்கும் உணவுக்குமான வசதிகள் இல்லை
• தொடர்புக்கு: முரளிதர் சங்கர் குரூவ், பூசாரி, மொபைல்: 9527235438