சாம்ப சதாசிவ ஆலயம்

டொங்கர்காவ் (சிவ), தாலுகா: ஃபுலம்பிரி, மாவட்டம்: சத்ரபதி சாம்பாஜிநகர்

உயர்ந்த குன்றைச் சுற்றி வளைந்து செல்லும் சிறிய பாதை, சுற்றிலும் அடர்ந்த மரங்கள் நிறைந்த சூழல், மேலே சென்றதும் குன்றின் உச்சியில் கம்பீரமாக வீற்றிருக்கும் சாம்ப சதாசிவ மகாதேவரின் அழகான ஆலயம் – இந்த அற்புதக் காட்சியைப் புலம்ப்ரி வட்டத்தில் உள்ள டோங்கர்காவ் (சிவ) பகுதியில் காணலாம். இது தொண்டேஸ்வர மகாதேவர் ஆலயம் என்றும் அழைக்கப்படுகிறது. தனித்துவமான வடிவம் கொண்ட சிவலிங்கம் மற்றும் சாம்ப சதாசிவ ஆலயத்திற்கு அருகிலேயே அமைந்துள்ள நரசிம்ம மகாதேவர் ஆலயம் ஆகியவை இக்கோயிலின் இரண்டு சிறப்பம்சங்களாகும். பகவான் சிவனும், விஷ்ணுவின் அவதாரமான நரசிம்மரும் ஒரே இடத்தில் எழுந்தருளியிருப்பது அரிதான ஒன்றாகக் கருதப்படுகிறது. 

சாம்ப சதாசிவ என்பது மகாதேவனின் ஒரு திருநாமமாகும். தர்மசாஸ்திரப்படி, சாம்ப சதாசிவ என்பதற்கு உமாபார்வதி அதாவது அம்பிகையுடன் கூடிய சங்கரர் என்று பொருள். இந்தத் திருநாமத்தில் சிவனும் சக்தியும் இணைந்திருக்கும் நிலை உணர்த்தப்பட்டுள்ளது. ஆதி ஜகத்குரு சங்கராச்சாரியாரால் இயற்றப்பட்ட ‘சிவ ஸ்வர்ணமாலா ஸ்துதி மந்திரத்’தில் சாம்ப சதாசிவ போற்றப்பட்டுள்ளார். அந்த மந்திரம் ‘சாம்ப சதாசிவ சம்போ சங்கர சரணம் மே தவ சரணயுகம்’ என்ற வரியுடன் தொடங்குகிறது. மமகாராஷ்டிராவில் கிராமந்தோறும் சிவபெருமானின் ஆலயங்கள் உள்ளன; ஆனால் சாம்ப சதாசிவ என்ற பெயரில் அழைக்கப்படும் மகாதேவனின் ஆலயங்கள் மிகச் சிலவே உள்ளன. சத்ரபதி சாம்பாஜிநகர் மாவட்டத்தில் உள்ள டோங்கர்காவ் (சிவ) பகுதியில் அமைந்துள்ள இந்த ஆலயம் அவற்றில் ஒன்றாகும். இந்த ஆலயத்தில் சிவபக்தர்களின் கூட்டம் எப்போதும் நிறைந்திருக்கும். மேலும், அதன் இயற்கை எழில் கொஞ்சும் அமைவிடத்தினால் இது ஒரு சுற்றுலாத் தலமாகவும் புகழ்பெற்று விளங்குகிறது.

இந்தக் கோயில் உயரமான குன்றின் மீது அமைந்துள்ளதால், இப்பகுதியின் எந்த இடத்திலிருந்தும் இதைக் காண இயலும். டொங்கர்காவிலிருந்து சிறிது தொலைவில் கோயிலுக்குச் செல்லும் பாதை தொடங்குகிறது. அங்கிருக்கும் உயரமான இரும்பு நுழைவாயிலைக் கடந்து சிறிது தூரம் சென்றால், முதலில் கணபதி கோயிலை அடையலாம். அரை திறந்த நிலையில் உள்ள சபாமண்டபம் மற்றும் கருவறை, அதன் மேல் உயர்ந்த கோபுரம் என இக்கோயில் அமைக்கப்பட்டுள்ளது. சபாமண்டபத்தில் உள்ள உயர்ந்த மேடையில் மூஷிகத்தின் கல் சிலை உள்ளது. கருவறையில் வஜ்ரபீடத்தின் மீது கணேச மூர்த்தி வீற்றிருக்கிறார். அங்கு தரிசனம் முடித்து மேலும் மேலே வந்தால் வாகனங்களை நிறுத்துவதற்கான இடம் உள்ளது. அங்கிருந்து கோயிலுக்குச் செல்ல படிகள் உள்ளன. மேலும், இந்தச் சாலை நேரடியாகக் கோயில் வரை செல்கிறது. படிகள் தொடங்கும் இடத்திலேயே அருகில் விட்டல்-ருக்மிணியின் சிறிய கோயில் ஒன்று உள்ளது.

குன்றின் உச்சியில் உள்ள பாறையின் மீது கட்டப்பட்ட உயரமான அடித்தளத்தில் சாம்ப சதாசிவ மகாதேவரின் இந்த பழமையான ஆலயம் அமைந்துள்ளது. பால்குண வத்ய பஞ்சமி, சகாப்தம் ௧௯௩௩-ஆம் ஆண்டில் இந்த ஆலயத்தின் திருப்பணிகள் மேற்கொள்ளப்பட்டன. முகமண்டபம், சபாமண்டபம் மற்றும் கருவறை என ஆலயம் அமைக்கப்பட்டுள்ளது. ஆலயத்தின் முன்னால் பெரிய ஹோமகுண்டம் உள்ளது. மூன்று படிகள் ஏறி முகமண்டபத்திற்குள் நுழைய வேண்டும். முகமண்டபத்தில் நான்கு பெரிய தூண்கள் உள்ளன, அவை வளைவுகளால் இணைக்கப்பட்டுள்ளன. அதன் சமதள மேற்கூரையின் மீது ஒரு பெரிய சிவலிங்கம் உள்ளது, அதன் மேல் படம் எடுத்த நிலையில் நாகத்தின் திருவுருவம் காணப்படுகிறது. 

முகமண்டபத்திலிருந்து ஒரு வளைவு போன்ற நுழைவாயில் வழியாக சபா மண்டபத்திற்குள் நுழையலாம். புதிதாகக் கட்டப்பட்ட இந்தச் சதுர வடிவ சபா மண்டபத்தின் தூண்களிலிருந்து அதன் பழமையான கட்டடக்கலை பாணியை அறிய முடிகிறது. சதுர மண்டபத்தின் சுவர்களில் இரு பக்கங்களிலும் தலா நான்கு தூண்கள் உள்ளன. அதற்கு அப்பால் சிறிது இடைவெளி விட்டு, தலா மூன்று அகலமான சதுரத் தூண்கள் உள்ளன. இந்தத் தூண்களுக்கு இடைப்பட்ட பகுதியில், ஒரே கல்லில் செதுக்கப்பட்ட உயரமான நந்தி மற்றும் ஆமை சிலைகள் உள்ளன. பிரநுழைவு வாயிலுக்கு முன்னால் அமைக்கப்பட்டுள்ள தடுப்பு வேலிகளால் நேரடியாகச் சபா மண்டபத்திற்குச் செல்ல இயலாது. இந்த வாசலில் இருந்து இடது மற்றும் வலது பக்கமாக கருவறையின் வாசலுக்கு வரிசையாகச் சென்று வர தடுப்பு வேலிகளால் அமைக்கப்பட்ட பாதை உள்ளது. கருவறைக்கும் வளைவான தோரண வாயில் உள்ளது. அங்கிருந்து படியிறங்கி கருவறைக்குள் நுழைய வேண்டும். இங்கு மையப்பகுதியில் தரைமட்டத்திற்குக் கீழே, சிறிய எஃகு தடுப்பு வேலி அமைக்கப்பட்ட சதுர வடிவிலான இடத்தில் சிவலிங்கம் உள்ளது. இந்த லிங்கத்தின் ஆவுடையார் மீன் வடிவில் உள்ளது மற்றும் உருளை வடிவ லிங்கத்தின் மீது படம் எடுத்த நிலையில் நாகத்தின் திருவுருவம் உள்ளது. கருவறையின் பக்கவாட்டில் விநாயகரின் திருவுருவம் உள்ளது. 

பொதுவாகக் கோயிலின் கருவறையின் மீது விமானம் அமைக்கப்பட்டிருக்கும். ஆனால், இந்த சாம்ப சதாசிவ மகாதேவக் கோயிலின் கருவறையின் வெளிப்பகுதியைப் பார்க்கும்போது, விமானமானது தரைப்பகுதியிலிருந்தே எழுப்பப்பட்டது போன்ற தோற்றத்தை அளிக்கிறது. இத்தகைய அமைப்பில் கருவறையும் விமானமும் ஒன்றோடொன்று இணைந்து காணப்படுகின்றன. கருவறையுடன் கூடிய இந்த ஐந்து அடுக்கு விமானத்தின் நடுவில் உள்ள மூன்று அடுக்குகளில் நான்கு பக்கங்களிலும் சிறு சன்னதிகள் உள்ளன. அதன் மேல் உள்ள அடுக்கில் நான்கு பக்கங்களிலும் ஊருசிருங்க முறையில், அதாவது ஒன்றன் மேல் ஒன்றாக அமைக்கப்பட்ட சிறு விமான வரிசைகள் உள்ளன. உச்சியில் இரு அடுக்கு தங்க முலாம் பூசப்பட்ட ஆமலக்கமும், அதன் மேல் கலசமும் உள்ளன. கோயிலின் சபாமண்டபத்தின் மீதும் வட்டவடிவ விமானம் அமைந்துள்ளது.

இந்தக் கோவிலின் அருகில் ஒரு தரைத்தளக் கட்டிடத்தில் நரசிம்ம மகாதேவர் கோவில் உள்ளது. உள்ளே சிவபெருமானின் தியான நிலையில் உள்ள திருவுருவமும், அதற்கு அருகில் இரணியகசிபுவின் வயிற்றைக் கிழிக்கும் நரசிம்மரின் திருவுருவமும் உள்ளன. மிகவும் ரம்மியமான மலைப்பகுதியில் அமைந்துள்ள இந்த அழகான கோவிலில், ஒவ்வொரு ஆடி மாத திங்கட்கிழமைகளிலும், மகா சிவராத்திரியன்றும் பக்தர்களின் கூட்டம் அதிகமாக இருக்கும். மகா சிவராத்திரியன்று கோவில் வளாகம் ஒரு திருவிழாவைப் போன்ற தோற்றத்தைப் பெறுகிறது. பல நேரங்களில் இப்பகுதியிலுள்ள தொடக்கப்பள்ளி மாணவர்களின் ஒரு நாள் சுற்றுலாப் பயணங்களும் இங்கு நடைபெறுகின்றன. இந்த சாம்ப சதாசிவ மகாதேவர் கோவிலைப் போற்றி பலர் பாடல்களையும் இயற்றியுள்ளனர். 

பயனுள்ள தகவல்கள்

• புலம்பிரியிலிருந்து ௧௨ கி.மீ, மற்றும் சத்ரபதி சாம்பாஜி நகரிலிருந்து ௪௦ கி.மீ தொலைவில்
• டொங்கர்காவிற்கு வருவதற்கு ஃபுலம்பிரியிலிருந்து அரசுப் பேருந்து வசதி உள்ளது.
• சொந்த வாகனங்கள் திருக்கோயிலின் வாகன நிறுத்துமிடம் வரை வரலாம்.
• கோயிலின் சுற்றுப்புறத்தில் தங்குவதற்கும் காலை உணவு உண்பதற்கும் வசதிகள் இல்லை.
• தொடர்பு : கணேஷ் மகாராஜ், அலைபேசி : ௭௬௬௬௫௮௪௩௫௧, 
• கிரண் குருஜி, அலைபேசி: ௯௫௪௫௧௩௮௬௨௧