லிங்கேசுவரர் கோவில்

இளியே, தாலுகா தேவ்கட், மாவட்டம் சிந்துதுர்க்

தேவ்கட்டில் உள்ள ஸ்ரீசேத்திரம் குண்கேசுவரத்தைச் சேர்ந்த குண்கேசுவரரின் லிங்கேசுவர மகாதேவர் இவரது மூத்த தம்பியாகக் கருதப்படுகிறார். இளியே மேட்டுப் பகுதியில், இயற்கை எழில் கொஞ்சும் மற்றும் அமைதியான சூழலில் லிங்கேசுவரர் கோவில் அமைந்துள்ளது. இக்கோவிலில் செய்யப்படும் வழிபாடு குண்கேசுவரரைச் சென்றடைகிறது என்பது பக்தர்களின் அசைக்க முடியாத நம்பிக்கையாகும். இதனால் இக்கோவிலுக்கு கூடுதல் ஆன்மீக முக்கியத்துவம் கிடைத்துள்ளது. இக்கோவிலின் பின்புறம் காட்டப்படும் குகைப் பாதையின் முகப்பு மற்றும் கோவிலின் முன்பகுதியில் உள்ள பண்டைய கிணறு ஆகியவை இங்கு வரும் பக்தர்களின் முக்கியக் கவர்ச்சி இடங்களாகும்.

லிங்கேசுவரரின் இக்கோவில் எப்போது கட்டப்பட்ட்து என்பது துல்லியமாகத் தெரியவில்லை. எனினும் இது பழமையானது. இதுபோன்ற பழமையான வரலாறு அறியப்படாத கட்டிடங்கள் அல்லது பொருட்களை ‘பாண்டவர் காலத்தைச் சேர்ந்தது’ என்று கூறும் வழக்கம் உள்ளது. மகாபாரதம் எழுதப்பட்ட காலம் பொது ஆண்டுக்கு முன்பு ௮௬௦ முதல் ௮௪௦ வரை என்று ஆய்வாளர்கள் முடிவு செய்துள்ளனர், அதேசமயம் மகாபாரதத்தில் நிகழ்ந்த சம்பவங்கள் பொது ஆண்டுக்கு முன்பு மூவாயிரம் ஆண்டுகளுக்கு முன்பு அதாவது சிந்து சமவெளி நாகரிகத்திற்கும் முந்தைய காலத்தில் நடந்தவை என்ற கருத்தை சில ஆராய்ச்சியாளர்கள் முன்வைத்துள்ளனர். இக்கோவில் அந்த அளவுக்குப் பழமையானது இல்லாவிட்டாலும், இங்கிருக்கும் கிராம மக்கள் அவ்வாறே நம்புகின்றனர். அதோடு இந்தத் தெய்வம் குண்கேசுவரத்தில் உள்ள குண்கேசுவர மகாதேவனின் மூத்த அண்ணன் என்று இங்கிருக்கும் மக்கள் கருதுகின்றனர். மகாசிவராத்திரியன்று குண்கேசுவரத்தில் திருவிழா நடைபெறும் போது, சுற்றுவட்டாரப் பகுதிகளைச் சேர்ந்த பல தெய்வங்கள் அவரைச் சந்திப்பதற்காகச் செல்கின்றன; ஆனால் கடீதாம்ஹானேவைச் சேர்ந்த ராட்டேசுவரர் அல்லது ராட்டேசுவரரைப் போலவே இளியேவின் லிங்கேசுவரரும் குண்கேசுவரரைச் சந்திப்பதற்காகச் செல்வதில்லை.

இது தொடர்பான ஐதிகம் என்னவென்றால், மகாசிவராத்திரி திருவிழா இளியேவில் உள்ள லிங்கேசுவரர் கோவிலில் நடைபெறுவது வழக்கம். அப்போது லிங்கேசுவரர் தேவன் நீராடுவதற்காகக் குண்கேசுவரத்திற்குச் செல்வார். அப்போது ஒருமுறை ஊரைச் சேர்ந்த ஒரு மூதாட்டி குண்கேசுவரத்தில் உள்ள கரிய பாறையிலிருந்து கீழே விழுந்தார். அன்றிலிருந்து லிங்கேசுவரர் குண்கேசுவரத்திற்கு நீராடச் செல்வதை நிறுத்திவிட்டார். எனினும் ஒவ்வொரு மூன்று ஆண்டுகளுக்கு ஒருமுறை லிங்கேசுவரர் மித்மும்பராவுக்குச் செல்கிறார்.

கிழக்கு நோக்கியுள்ள லிங்கேசுவரர் கோவில் சமீபத்தில் தான் திருப்பணி செய்யப்பட்டு புதுப்பிக்கப்பட்டுள்ளது போல் தெரிகிறது. இக்கோவில் உயர்வான மேடையில் கட்டப்பட்டுள்ளது. கோவிலின் முன்பு உயர்வான திண்ணை மீது கொங்கண முறை தீபஸ்தம்பம் உள்ளது. அதன் வலது பக்கத்தில் சிறிது தூரத்தில் உள்ள திண்ணையில் துளசி மாடமும் சிங்கச் சிலையும் உள்ளது. சங்கர மகாதேவரின் கோவிலின் முன்பு எப்போதும் நந்தி இருக்கும். இங்கு நந்திக்குப் பதிலாக சிங்கத்தின் சிலை உள்ளது. இந்தத் திண்ணையின் முன்பகுதியிலேயே லிங்கேசுவரரின் பாதச்சுவடுகளும், உள்ளூர் தெய்வங்களின் பாறைகளும் உள்ளன. தீபஸ்தம்பத்தின் இடது பக்கத்தில் அனுமாரின் சிறிய சிலை உள்ளது. சபா மண்டபம், அந்தராளம் மற்றும் கருவறை என இக்கோவில் கட்டமைப்புக்கப்பட்டுள்ளது. இங்குள்ள சபா மண்டபத்திற்கும் அதற்கு அடுத்தபடியான கோவிலுக்கும் உள்ள கட்டிடக் கலை பாணியில் வேறுபாடு உள்ளது. சபா மண்டபமானது கொங்கண கட்டிடக் கலை பாணியில் கட்டப்பட்டுள்ளது, இரண்டு சரிவு முகடுகளைக் கொண்ட கூரையும் அரை திறந்த வகையிலானதுமாகும். சபா மண்டபத்தில் இருக்கை மேடைகளும் அதன் மீது பொருத்தப்பட்ட எட்டு எண்கோணத் தூண்களும் உள்ளன. இந்தத் தூண்களின் சிறப்பம்சம் என்னவென்றால், அதன் உச்சிப் பகுதியில் சதுர வடிவம் போன்ற அமைப்பு உள்ளது மற்றும் அதன் மீது செதுக்கப்பட்ட வேலைப்பாடுகளுடன் கூடிய அலை வடிவக் கைகள் உள்ளன. இதில் உள்ள நாகச் சிலைகளும், சிங்கச் சிலைகளும் கண்ணைக் கவரும் வகையில் உள்ளன. இந்த மரத்தாலான அலை வடிவக் கைகள் மூலமாக இக்கோவிலின் தொன்மை வெளிப்படுகிறது. மண்டபத்தில் பல மணிகள் தொங்கவிடப்பட்டுள்ளதைக் காணலாம். இங்கு மணிகளைக் கட்டி பக்தர்கள் கடவுளுக்குச் செய்த நேர்த்திக்கடனைச் செலுத்துகின்றனர்.

மண்டபத் தரையிலிருந்து ஐந்து படிகள் உயரத்தில் திண்ணை போன்ற அந்தராளம் உள்ளது. அந்தராளத்தில் கருவறையின் வாசலின் ஒரு பக்கத்தில் நந்தியின் கல் சிலை உள்ளது, அதே நேரத்தில் கருவறையின் முகப்புச் சுவற்றில், வலது பக்கத்தில் உள்ள மாடத்தில் கறுப்புக் கல்லில் செதுக்கப்பட்ட விநாயகர் சிலை உள்ளது. கருவறையின் நுழைவாயில் எளிய முறையில் அமைந்துள்ளது மற்றும் அதன் மேல் பகுதியில் கீர்த்திமுகம் உள்ளது. இக்கோவிலில் லிங்கேசுவரரின் பாதாள லிங்கம் பிரதிஷ்டை செய்யப்பட்டுள்ளது. தரையிலிருந்து கீழ் நோக்கிப் பிரதிஷ்டை செய்யப்பட்டுள்ள லிங்கம் பாதாள லிங்கம் என்று அழைக்கப்படுகிறது. இக்கோவிலில் அந்தராளத்திலிருந்து மூன்று படிகள் இறங்கி கருவறைக்குள் செல்லப்படுகிறது. அங்கு தரையில் லிங்கேசுவரரின் திருமேனி (பிண்டம்) உள்ளது. இந்தத் திருமேனியின் சிறப்பம்சம் என்னவென்றால், அதன் ஆவுடையாரின் நடுவே பாதியளவு செதுக்கப்பட்ட, சிறிய பாறையைப் போன்ற தோற்றமுடைய லிங்கம் உள்ளது. கருவறையின் பின்சுவரில் உள்ள மாடத்தில் லிங்கேசுவரரின் லிங்க வடிவ முகமூடியும் மகுடமும் உள்ளன. இந்த மகுடத்தின் மீது லிங்கேசுவரரின் திருமுகச் சிலை உள்ளது.

இந்தச் சதுர வடிவக் கோவிலின் மீது புதிதாகக் கட்டப்பட்ட உயர்ந்த கோபுரம் உள்ளது. இந்த எண்கோணக் கோபுரத்தின் கட்டமைப்பும் சிறப்பு வாய்ந்ததாகும். கீழ் மட்டத்தில் பெரிய அளவிலான தேவகோட்டங்களும் (மாடங்கள்) உட்புறத்தில் அதைவிடச் சிறிய அளவிலான தேவகோட்டங்களும் உள்ளன. இந்தத் தேவகோட்டங்கள் அனைத்தின் மீதும் அமலகமும் சிறிய கலசமும் கொண்டமைந்த அமைப்பாகும். மிக மேல் பகுதியில் தாமரை இதழ்களுக்குள் அமலகமும் அதன் மீது உயர்ந்த கலசமும் உள்ளது. கோவிலின் கூரையின் நான்கு மூலைகளிலும் குள்ளமான சதுரத் தூண்களில் குடக் கமல வடிவம் உள்ளது.

கோவிலின் பின்பகுதியில், சுவரிலிருந்து சிறிது தூரத்தில் இரண்டு பாறைகள் உள்ளன. அவற்றின் மீது மலர்களும் குங்குமமும் சாற்றப்படுகின்றன. இதில் ஒரு பாறைக்குக் கீழே குகைப் பாதையின் முகப்பு இருப்பதாகக் கூறப்படுகிறது. இது தொடர்பாக ஒரு ஐதிகம் நிலவுகிறது, அதாவது லிங்கேசுவரர் தனது தம்பியான குண்கேசுவரரை இந்தைக் குகைப் பாதை வழியாகக் குண்கேசுவரத்திற்கு அனுப்பி வைத்தாராம். பக்தர்கள் இந்த இடத்திலிருந்தே குண்கேசுவரரை வழிபடுகிறார்கள். இந்த வழிபாடு குண்கேசுவரரைச் சென்றடைகிறது என்பது பக்தர்களின் அசைக்க முடியாத நம்பிக்கையாகும். கோவிலின் துளசி மாடத்திலிருந்து சற்றுத் தொலைவில் ஒரு பண்டைய கிணறு உள்ளது. இந்தக் கிணற்றில் படிகள் உள்ளன மற்றும் இதில் ஆண்டு முழுவதும் நீர் நிரம்பி வழியும் என்று கிராம மக்கள் தெரிவிக்கின்றனர்.

இக்கோவிலில் மகாசிவராத்திரியன்று பெரிய திருவிழா நடைபெறுகிறது. இந்தத் திருவிழாவை முன்னிட்டு பக்தர்கள் பெருமளவில் லிங்கேசுவரரைத் தரிசிக்க வருகின்றனர். அதேபோன்று இங்கு ஒவ்வொரு சிராவண மாத திங்கட்கிழமையன்றும் தரிசனத்திற்காக பக்தர்களின் கூட்டம் அலைமோதுகிறது.

பயனுள்ள தகவல்

• தேவ்கட்டிலிருந்து ௧௧ கிமீ, மாள்வணத்திலிருந்து ௩௯ கிமீ தொலைவில்
• தேவ்கட்டிலிருந்து பேருந்து (ST) வசதி
• சொந்த வாகனங்கள் கோவில் வரை வரலாம்
• சுற்றியுள்ள பகுதியில் தங்கும் விடுதியும் சிற்றுண்டி வசதியும் இல்லை