ஜெகநாத் மகாதேவர் கோவில்

கலாலி-வட்சர் சாலை, வடோதரா, வடோதரா மாவட்டம்

தொன்மையான புராண வரலாற்றின்படி, வடோதராவில் உள்ள ஜெகநாத் மகாதேவர் கோவில் அமைந்திருக்கும் இந்த இடத்தில்தான், இக்ஷ்வாகு வம்சத்தைச் சேர்ந்த திரிசங்கு மன்னரை அவரது மனித உடலுடனேயே சொர்க்கத்திற்கு அனுப்ப விஸ்வாமித்திர முனிவர் யாகம் செய்தார். வடோதரா நகரத்தைப் பாதுகாக்கும் ஒன்பது நவநாதர்களில் ஒன்றான இக்கோவில், விஸ்வாமித்திர முனிவரால் நிறுவப்பட்டது. நவநாத மகாதேவர் கோவில்களில் எட்டாவது இடத்தில் விளங்கும் இந்த தொன்மையான கோவிலில் மூன்று சிவலிங்கங்கள் உள்ளன. இங்குள்ள சுயம்பு சிவலிங்கத்தில் கலப்பை பட்ட வடு காணப்படுகிறது. பொதுவாக சிவன் கோவில்களில் நந்தி சிவலிங்கத்திற்கு நேர் எதிரே அமைந்திருக்கும், ஆனால் இங்கு சிவலிங்கம் நந்திக்கு சற்று இடதுபுறத்தில் அமைந்துள்ளது.

திரிசங்கு மன்னரின் கதை வால்மீகி ராமாயணத்தின் பாலகாண்டத்தில் விவரிக்கப்பட்டுள்ளது. இக்கதையின்படி, திரிசங்கு இக்ஷ்வாகு வம்சத்தைச் சேர்ந்த ஒரு மன்னராவார், அவர் தனது மனித உடலோடு சொர்க்கத்திற்குச் செல்ல விரும்பினார். இதற்காக ஒரு யாகத்தை நடத்துமாறு வசிஷ்ட முனிவரிடம் வேண்டினார், ஆனால் வசிஷ்டர் அது சாத்தியமில்லை என்று கூறிவிட்டார். பின்னர் திரிசங்கு வசிஷ்டரின் புதல்வர்களை அணுகினார், அவர்களும் மறுத்துவிட்டனர். திரிசங்கு வேறு யாரையாவது நாடப்போவதாகக் கூறியதால் கோபமடைந்த வசிஷ்டரின் புதல்வர்கள், அவரை ஒரு சண்டாளனாக (குலநீக்கம் செய்யப்பட்டவனாக) மாறுமாறு சபித்தனர். இதன் பிறகு திரிசங்கு விஸ்வாமித்திர முனிவரிடம் அடைக்கலம் புகுந்தார், விஸ்வாமித்திரர் யாகம் ஒன்றை நடத்தி திரிசங்குவை சண்டாள வடிவத்திலேயே சொர்க்கத்திற்கு அனுப்பி வைத்தார். உள்ளூர் தலபுராணத்தின்படி, இந்த யாகம் குஜராத்தில் உள்ள இந்த புனித பூமியில்தான் நடைபெற்றது.

இக்கோவிலைப் பற்றிய மற்றொரு தலவரலாறு என்னவென்றால், பண்டைய காலத்தில் வடோதரா நகரம் ‘வட்பத்ரக்’ அல்லது ‘வட்பத்ரபூர்’ என்று அழைக்கப்பட்டது. இப்பகுதி காடுகளாலும் வயல்களாலும் சூழப்பட்டிருந்தது. ஒரு நாள், விவசாயி ஒருவர் தனது வயலை உழுது கொண்டிருந்தபோது, அவரது கலப்பை ஏதோ ஒன்றின் மீது மோதும் சப்தம் கேட்டது. ஆரம்பத்தில் அவர் அதைப் பொருட்படுத்தவில்லை, ஆனால் அதே இடத்தில் மீண்டும் கலப்பை தட்டியபோது, அவர் தோண்டிப் பார்த்ததில் ஒரு சுயம்பு சிவலிங்கத்தைக் கண்டெடுத்தார். கலப்பை பட்டதன் காரணமாக அந்தக் கல்லில் இருந்து ரத்தம் வழிந்தது. அந்த விவசாயி இந்த அற்புத நிகழ்வை மற்றவர்களிடம் பகிர்ந்துகொண்டார், அதைத் தொடர்ந்து கிராம மக்கள் ஒன்று கூடி அந்த சிவலிங்கத்தை முறைப்படி பிரதிஷ்டை செய்தனர். இன்று சிவலிங்கத்தில் காணப்படும் தழும்புகள் அந்த கலப்பை பட்டதால் ஏற்பட்டவை என்று கூறப்படுகிறது. திரிசங்குவுக்காக விஸ்வாமித்திரர் இங்கு யாகம் செய்ததால், இறைவன் ‘யாகநாத் மகாதேவர்’ என்று அழைக்கப்பட்டு, பின்னர் அது ‘ஜெகநாத்’ என்று மருவியது. இக்கோவில் கெய்க்வாட் வம்சத்தின் ஆட்சியின் போது புதுப்பிக்கப்பட்டது, மேலும் சமீபத்தில் தற்போதைய வடிவத்திற்குச் சீரமைக்கப்பட்டுள்ளது.

இக்கோவில் விஸ்வாமித்ரி நதிக்கரையில் விசாலமான பிரகாரத்தில் அமைந்துள்ளது. பிரகாரத்தின் நுழைவாயிலில் செதுக்கப்பட்ட தூண்களுடன் கூடிய உயரமான கோபுரம் உள்ளது. உள்ளே நுழைந்ததும், எழிலார்ந்த சிகரத்துடன் கூடிய, இளஞ்சிவப்பு நிறக் கற்களால் ஆன கோவிலின் கண்கவர் கட்டடம் நம் கவனத்தை ஈர்க்கிறது. கோவிலின் முன் பெரிய நந்தி மண்டபம் உள்ளது, அதில் கருப்பு பளிங்குக்கல்லால் ஆன பிரமாண்டமான நந்தி சிலை உள்ளது. இந்தச் சிலை கருவறையில் உள்ள சிவலிங்கத்திற்கு நேர் எதிரே இல்லாமல் சற்று பக்கவாட்டில் அமைந்துள்ளது.

ஜெகநாத் மகாதேவர் கோவில் ஒரு உயர்ந்த மேடையின் மீது கட்டப்பட்டுள்ளது. இதன் கட்டமைப்பு தரிசன மண்டபம், திறந்தவெளி சபா மண்டபம், அந்தராளம் மற்றும் கருவறை ஆகியவற்றைக் கொண்டுள்ளது. இக்கோவில் ‘உருஷ்ருங்கா’ வகை சிகரத்துடன் கூடிய ‘நகர’ பாணி கட்டிடக்கலையைக் கொண்டுள்ளது. ஐந்து படிகள் ஏறினால் கோவிலின் தரிசன மண்டபத்தை அடையலாம். இங்குள்ள தூண்களிலும், சபா மண்டபம் மற்றும் அந்தராளத்திலும் அழகிய சிற்ப வேலைப்பாடுகள் அலங்கரிக்கின்றன. இரண்டு தூண்களுக்கு இடையே மகர தோரணங்கள் (முதலை வளைவுகள்) உள்ளன. சபா மண்டபத்தின் மேல் விதானத்தில் பல தெய்வங்களின் சிலைகள் உள்ளன. அந்தராளத்தில் கணபதியும் ஹனுமானும் எழுந்தருளியுள்ளனர்.

மூன்று படிகள் கீழே இறங்கினால் கோவிலின் கருவறையை அடையலாம். இங்கு, பெரிய வட்டவடிவ பீடத்தில், நாகக் குடையின் நிழலில் கல்லால் ஆன சிவலிங்கம் வீற்றிருக்கிறது. சிவலிங்கத்திற்கு அருகில் பஞ்சலோக பீடங்களுடன் கூடிய இரண்டு சிறிய சிவலிங்கங்கள் உள்ளன. சிவலிங்கத்திற்கு பின்னால் உள்ள சுவரில் பார்வதி தேவியின் சந்நிதி அமைந்துள்ளது.

ஜெகநாத் மகாதேவர் கோவிலுக்கு நேர் எதிரே அழகாக வடிவமைக்கப்பட்ட கணபதி கோவில் உள்ளது. இக்கோவிலின் கருவறையில் 11 அடி உயரமுள்ள பிரம்மாண்டமான கணபதி சிலை உள்ளது. இச்சிலை ராஜஸ்தானில் இருந்து கொண்டு வரப்பட்ட வெள்ளை பளிங்குக்கல்லில் செதுக்கப்பட்டது. இச்சிலை முதலில் ராஜஸ்தானில் இருந்து கொண்டு வரப்பட்டு, அதன்பின்னரே அதைச் சுற்றி கோவில் கட்டப்பட்டது. இந்த கணபதி “படா கணேஷ்” (பெரிய கணபதி) என்று அழைக்கப்படுகிறார்.

கோவில் வளாகத்தில் ஒரு யாகசாலையும், கால பைரவருக்கு ஒரு சிறிய சந்நிதியும் உள்ளன. அருகில், பெரிய கண்ணாடி மண்டபத்தில் ‘சிவ பரிவாரம்’ பிரதிஷ்டை செய்யப்பட்டுள்ளது. ஒரு லாரியின் மீது பெரிய நந்தி சிலையும், அதில் சிவபெருமானின் குடும்பமும் எழுந்தருளியுள்ளனர். இந்த லாரி ஆண்டு முழுவதும் இங்கேயே இருக்கும், மகா சிவராத்திரி அன்று மட்டுமே நகர் வலம் வருதற்காக வெளியே எடுக்கப்படும். கோவில் வளாகத்தில் ஓர் அரச மரமும் உள்ளது, அதை சுற்றி வந்து பல பக்தர்கள் வழிபாடு செய்கின்றனர்.

இக்கோவிலில் காலை 7 மணிக்கும் மாலை 7 மணிக்கும் ஆரத்தி வழிபாடுகள் நடைபெறுகின்றன. மதியம் 12 மணிக்கும் மாலை 7 மணிக்கும் இறைவனுக்கு நைவேத்தியம் படைக்கப்படுகிறது. கோவில் மதியம் 1 மணி முதல் மாலை 4 மணி வரை நடைசாத்தப்பட்டிருக்கும். சாந்நித்தியம் நிறைந்த இந்த சிவலிங்கத்திற்கு அபிஷேகம் செய்ய பல பக்தர்கள் தங்கள் குடும்பத்தினருடன் வருகை தருகின்றனர். பல பக்தர்கள் தொடர்ந்து ஐந்து அல்லது ஏழு திங்கட்கிழமைகள் விரதம் மேற்கொள்கின்றனர். இக்கோவிலில் உள்ள சிவலிங்கத்தை வழிபடும் போது ஆண் பக்தர்கள் வேட்டியும், பெண் பக்தர்கள் புடவையும் கண்டிப்பாக அணிய வேண்டும்.

முக்கிய அம்சங்கள்

• வடோதரா ரயில் நிலையத்திலிருந்து 6 கி.மீ தொலைவில் அமைந்துள்ளது
• குஜராத்தின் பல நகரங்களிலிருந்து வடோதராவுக்கு அரசுப் பேருந்து (ST), ரயில் மற்றும் விமானச் சேவைகள் உள்ளன
• சொந்த/தனியார் வாகனங்கள் மூலம் கோவிலை அடையலாம்
• இப்பகுதியில் தங்குவதற்கும் காலை உணவிற்கும் பல வசதிகள் உள்ளன