திகம்பர் ஜெயின் அதிசய க்ஷேத்திரம் (நேமகிரி சன்ஸ்தான்)

ஜிந்தூர், தாலுகா: ஜிந்தூர், மாவட்டம்: பர்பணி

ஜிந்தூரில் உள்ள ஸ்ரீ திகம்பர் ஜெயின் அதிசய நேமகிரி சன்ஸ்தான் ஜெயின தீர்த்தக்ஷேத்திரங்களில் மிகவும் புகழ்பெற்ற இடமாகும். அஜந்தா மலைத்தொடரில் உள்ள ஒரு சிறிய வட்ட வடிவிலான மலையின் நிலத்தடியில் இக்ஷேத்திரம் அமைந்துள்ளது. இங்குள்ள நேமகிரி மலையில் உள்ள ஏழு குகைகளில் ஏழு ஜெயின தீர்த்தங்கரர்களின் பழமையான மூர்த்திகளின் தரிசனம் கிடைக்கிறது. இங்குள்ள பகவான் நேமிநாதரின் 7 அடி உயரமும் 15 டன் எடையும் கொண்ட மூர்த்தியும், அந்தரிக்ஷ பார்ஷ்வநாதரின் 6 அடி உயரமும் 9 டன் எடையும் கொண்ட காற்றில் மிதக்கும் (அதாந்தரி) மூர்த்தியும் முக்கிய ஈர்ப்புகளாகும். இக்குகைகளில் உள்ள மூர்த்திகளை தரிசிக்க மூன்று குகைகள் வழியாக வெவ்வேறான பாதைகளில் வர வேண்டும். இப் பாதைகள் ஒன்றையொன்று சந்திக்கும் போது ஒரு சக்ரவியூகம் போல் தோன்றுகின்றன. இங்கிருந்து அருகில் உள்ள சந்திரகிரி மலையில் சௌபீசி (இருபத்து நான்கு தீர்த்தங்கரர்) கோயில் உள்ளது. ஜெயின மதத்தினருக்குப் புனிதத் தலமாக விளங்கும் இக்ஷேத்திரத்திற்கு மகாராஷ்டிராவிலிருந்து மட்டுமின்றி ராஜஸ்தான், குஜராத், மத்தியப் பிரதேசம், கர்நாடகா உள்ளிட்ட பிற மாநிலங்களிலிருந்தும் வெளிநாடுகளிலிருந்தும் ஏராளமான பக்தர்களும் சுற்றுலாப் பயணிகளும் வருகை தருகின்றனர். இந்தப் புனிதக் குகைகளுக்குள் காலணிகளை அணிந்து சென்றால் தேனீக்கள் துரத்தும் என்றொரு நம்பிக்கை உள்ளது.

பழங்காலத்தில் யமராஜன் மற்றும் நேமிராஜன் ஆகிய இரு ஜெயின மன்னர்கள் இங்கு ஆட்சி செய்தனர். அக்காலத்தில் ஜிந்தூரின் பெயர் ‘ஜின்பூர்’ என்று இருந்தது. அது ‘ஜைன்பூர்’ அல்லது ‘ஜினதூர்’ என்றும் அழைக்கப்பட்டது. அதுவே மருவி ‘ஜிந்தூர்’ என்ற பெயர் நிலைபெற்றதாகக் கூறப்படுகிறது. அக்காலத்தில் இங்கு 14 ஜெயின கோயில்கள் இருந்தன. இருப்பினும், அந்நியப் படையெடுப்புகளின் போது இந்த இரு அரசர்களும் கொல்லப்பட்டனர்; படையெடுப்பாளர்கள் இங்குள்ள கோயில்களையும் நூற்றுக்கணக்கான ஜெயின மூர்த்திகளையும் சேதப்படுத்தினர். பக்தர்கள் தங்களது உயிரைப் பணயம் வைத்து அவற்றில் சில மூர்த்திகளைப் பாதுகாத்தனர். அம் மூர்த்திகள் நகரில் உள்ள மகாவீர் ஜெயின் கோயிலில் பாதுகாப்பாக வைக்கப்பட்டுள்ளன. சுமார் 450 ஆண்டுகளுக்கு முன்பு தனது குடும்பத்துடன் இங்கு வந்த வீர் சங்கவி என்பவருக்குத் தெய்வீக அசரீரி/கனவு தோன்றி, அவர் தோண்டியபோது இம்மூர்த்திகள் கண்டெடுக்கப்பட்டன. இவர் 1611 ஆம் ஆண்டில் இம்மூர்த்திகளை மீண்டும் பிரதிஷ்டை செய்ததாகத் தலவரலாறு கூறுகிறது. இங்குள்ள நேமிநாதரின் பாதத்தின்கீழ் ஒரு கல்வெட்டு உள்ளது. அதில் “ஸ்ரீ சகே 1532 ஸ்ராவண சுத்த 12 ஸ்ரீ நாந்தகாவ் நிவாசி ஸ்ரீ பத்தேரவால் ஞாதி ஸ்ரீ ஜசூசங்கவி பார்யா கொண்டாய் புத்ர வீரசங்கவி பார்யா வால்வி சங்கவி புத்ர நேமாசங்கவி உருவாக்கினார். நேமிநாத் நேமகிரி” என்று பொறிக்கப்பட்டுள்ளது. வீர் சங்கவியின் குடும்பத்தைச் சேர்ந்த 12 மற்றும் 13-ஆம் தலைமுறையினர் இக்ஷேத்திரத்தின் நிர்வாகத்தைக் கவனித்து வருகின்றனர். ஜிந்தூர் நகரத்தின் வடக்கே சுமார் 3 கி.மீ. தொலைவில் இக்ஷேத்திரம் அமைந்துள்ளது. இக்ஷேத்திரத்தின் நான்கு பக்கங்களிலும் அடர்ந்த மரங்கள் சூழ்ந்துள்ளன. முற்காலத்தில் இப்பகுதியில் கொடூரமான வனவிலங்குகள் சுதந்தரமாக உலாவந்து, மாலையில் குகையில் ஓய்வெடுக்கும் என்று சொல்லப்படுகிறது. நேமகிரி மற்றும் சந்திரகிரி ஆகிய இரு மலைகளுக்கும் இடையே அபதபி நதி பாய்கிறது.

ஊரிலுள்ள முகப்பு வளைவிலிருந்து சிறிது தொலைவில் இக்ஷேத்திரம் உள்ளது. இக்ஷேத்திரத்திற்கு மதில் சுவருடன் கூடிய அழகான நுழைவுவாயில் உள்ளது. அதன் இருபுறமும் த்வாரபாலகர்கள் உள்ளனர். இந்நுழைவுவாயில் வழியே உள்ளே நுழைந்ததும், முற்றத்தில் எதிரே அனைத்து ஜெயின கோயில்களின் முன்னும் காணப்படும் மஹிமாஸ்தம்பத்தின் (மானஸ்தம்பம்) தரிசனம் கிடைக்கிறது. முற்றத்தில் உள்ள மண்டபங்களில் பல்வேறு விசேஷங்களின் போது ஆன்மீக நிகழ்ச்சிகள் நடைபெறுகின்றன. முதன்மை நுழைவுவாயிலின் இருபுறமும் உள்ள சிறு சந்நிதிகளில் முறையே பத்மாவதி (இடப்புறம்) மற்றும் தரணேந்திர யக்ஷன் (வலப்புறம்) ஆகியோரின் மூர்த்திகள் உள்ளன. இந்நுழைவுவாயிலில் நுழைந்து உள்ளே வந்ததும் 20 அடி கீழே குகைகள் உள்ளன. இங்குள்ள முதல் குகையில் 24-வது ஜெயின தீர்த்தங்கரர் பகவான் மகாவீரரின் கற்சிலை உள்ளது. இக்குகையில் ஆச்சார்யா பத்ரபாகு மற்றும் ஆச்சார்யா சாந்திசாகர் ஆகியோரின் பத்மகமலம் அமைந்திருப்பது இதன் சிறப்பம்சமாகும். இங்கு சில உலோக மூர்த்திகளும் உள்ளன. இரண்டாவது குகையில் முதல் ஜெயின தீர்த்தங்கரர் ஆதிநாத பகவானின் கற்சிலை உள்ளது. மூன்றாவது குகைக்கு வர சில படிகள் இறங்கிச் செல்ல வேண்டும். இங்கு பகவான் சாந்திநாத ஸ்வாமியின் 6 அடி உயரமுள்ள பத்மாசன மூர்த்தி எழுந்தருளியுள்ளார். இம்மூர்த்தியின் கரங்கள் கூப்பிய நிலையில் உள்ளன. இம்மூர்த்தியின் திருப்பாதங்களின் கீழ், இம்மூர்த்தியை மீண்டும் பிரதிஷ்டை செய்தவர்களின் இரு ஆண்கள் மற்றும் இரு பெண்களின் உருவங்கள் பொறிக்கப்பட்டுள்ளன. நான்காவது குகையில் பகவான் நேமிநாதரின் கருங்கல்லில் செதுக்கப்பட்ட பத்மாசன, திகம்பர கோலத்திலான மூர்த்தி உள்ளது. இம்மூர்த்தியின் உயரம் 7 அடி மற்றும் எடை 15 டன் ஆகும். இம்மூர்த்தி 4 அடி உயரமும் 7 அடி நீளமும் கொண்ட பீடத்தில் எழுந்தருளியுள்ளது. இக்குகையானது சுமார் 17 அடி நீளமும், 16 அடி அகலமும், 16 அடி உயரமும் கொண்டது. ஆண்டின் சில நாட்களில் சூரியனின் கதிர்கள் இம்மூர்த்தியின் பாதங்களில் விழுகின்றன என்று கூறப்படுகிறது. மூர்த்தியின் இருபுறமும் சிங்கச் சிற்பங்கள் செதுக்கப்பட்டுள்ளன. இம்மூர்த்தி ஆத்மசுத்தி மற்றும் மோக்ஷ மார்க்கத்தின் பிரதீகமாகக் கருதப்படுகிறது. இம்மூர்த்தியின் கீழ் உள்ள பீடத்தின் முன்பகுதியில், இதைப் பிரதிஷ்டை செய்தவர், அவருடைய தாய்-தந்தையர், இரு சகோதரர்கள் மற்றும் அவர்களின் மனைவிகளின் பெயர்களுடன் கூடிய வடிவங்கள் செதுக்கப்பட்டுள்ளன.

ஐந்தாவது குகையில் அந்தரிக்ஷ பார்ஷ்வநாத பகவானின் கற்சிலை எழுந்தருளியுள்ளது. இக்குகையின் நீளம் 17 அடி, அகலம் 12 அடி ஆகும். இங்குள்ள அந்தரிக்ஷ பார்ஷ்வநாத பகவானின் 9 டன் எடையும் 6 அடி உயரமும் கொண்ட மூர்த்தி 2 அடி உயர பீடத்தில் எழுந்தருளியுள்ளது. தியான முத்திரையில் கரங்களைக் கூப்பியவாறு உள்ள இம்மூர்த்தியின் மேல் ஒன்பது தலைகள் கொண்ட நாகம் படம் எடுத்துள்ளது. இந்நாகம் மூர்த்தியின் திருமேனியைச் சுற்றி வளைத்துள்ளது. இம்மூர்த்தி தரையிலிருந்து நான்கு விரல் இடைவெளியில் காற்றில் மிதப்பது போல் தோன்றுகிறது.

ஆறாவது குகைக்குச் செல்ல சில படிகள் ஏறி, குனிந்து செல்ல வேண்டும். இங்கு பகவான் நந்தீஸ்வரரின் 4.5 அடி உயர மூர்த்தி உள்ளது. ஏழாவது குகைக்கும் குனிந்தே செல்ல வேண்டும். இங்கு பகவான் பாகுபலியின் பிரம்மாண்ட மூர்த்தி உள்ளது. தபஸ்ஸில் மூழ்கியுள்ள இம்மூர்த்தியின் கழுத்து வரை படர்ந்துள்ள கொடி, தோள்களில் நாகங்களின் வாசம் மற்றும் தொடையில் வண்டு செய்த துளை ஆகியவற்றைக்காண முடிகிறது.

சந்திரகிரி மலையின் வடக்கே சந்திரகிரி குன்று உள்ளது. இங்கு முற்காலத்தில் திகம்பர் ஜெயினர்களின் ராஜுல்மாதாவின் பழமையான கோயில் இருந்தது. நேமகிரி மற்றும் சந்திரகிரி ஆகிய மலைகளுக்கு இடையே பூஜ்யஸ்ரீ சாரண ரிஷிதாரக முனி மஹாராஜாவின் பாதுகைகள் உள்ளன. அதன் அருகிலேயே சில அடி தூரத்தில் ஒரு கிணறு உள்ளது. சந்திரகிரி மலைக்கு வர சுமார் இருநூற்றம்பது (250) படிகள் உள்ளன. வழியில் இருபுறமும் மரங்கள் நிறைந்துள்ளன.

சந்திரகிரி மலையில் உள்ள கோயிலின் கர்ப்பகிரஹத்தில் நடுவில் மூன்று மூர்த்திகள் உள்ளன. அவற்றில் இருபத்து நான்கு ஜெயின தீர்த்தங்கரர்களின் தரிசனமும் கிடைப்பதாகச் சொல்லப்படுகிறது. இம்மூர்த்திகளின் இடப்புறம் சந்திரபிரபு பகவானின் வெண் கல் மூர்த்தியும், வலப்புறம் பகவான் மகாவீரரின் அழகிய மூர்த்தியும் உள்ளன. இந்தக் கர்ப்பகிரஹத்தில் சப்தம் எதிரொலிக்கிறது. இங்குள்ள பகவான் சந்திரபிரபுவின் மூர்த்தி முற்காலத்தில் கருங்கல்லில் இருந்தது. அது பின்னமடைந்த பிறகு, இங்கு புதிய மூர்த்தி பிரதிஷ்டை செய்யப்பட்டதாகக் கூறப்படுகிறது.

நேமகிரி சன்ஸ்தானத்திற்குத் தரிசனம் செய்ய தொலைதூரத்திலிருந்து வரும் பக்தர்களின் தங்குவதற்காக இங்கு பக்தநிவாஸ் கட்டப்பட்டுள்ளது. மேலும் இங்கு பிரசாதாலய வசதியும் உள்ளது. வளாகத்தில் உள்ள கோசாலையில் 170 கோமாதாக்கள் பராமரிக்கப்பட்டு வருகின்றன.

காலை 5.30 மணி முதல் இரவு 8.30 மணி வரை இங்கு தரிசனம் செய்யலாம். இங்கு ஆண்டுதோறும் பாத்ரபத வத்ய பஞ்சமி அன்று பெரிய உற்சவம் நடைபெறுகிறது. ஶ்ராவண சுத்த ஷஷ்டியன்று இங்கு பகவான் நேமிநாதர் ஜெயந்தி (நேமிநாதர் ஜன்ம கல்யாணக்) கொண்டாடப்படுகிறது. ஶ்ராவண சுக்ல சப்தமியன்று பார்ஷ்வநாதர் மோக்ஷ கல்யாணக் (மோக்ஷ உற்சவம்) தினத்தை முன்னிட்டு இங்கு பல்வேறு நிகழ்ச்சிகள் ஏற்பாடு செய்யப்படுகின்றன.

பயனுள்ள தகவல்கள்

• ஜிந்தூர் பேருந்து நிலையத்திலிருந்து 5 கி.மீ தொலைவில்
• பர்பணி நகரத்திலிருந்து 49 கி.மீ தொலைவில்
• ஜிந்தூரிலிருந்து தனியார் வாகனங்கள் மூலம் கோயிலை அடையலாம்
• வளாகத்தில் தங்குமிட மற்றும் சிற்றுண்டி வசதிகள் உள்ளன
• தொடர்பு : தன்யகுமார் களம்கர், தலைவர், மொ. 9403585548