தாதாஜி துனிவாலே தாம்

தாதா தர்பார் சாலை, கண்ட்வா, கண்ட்வா மாவட்டம்

மகாபாரதக் காலம் தொட்டே நீண்ட வரலாற்றைக் கொண்ட தொன்மையான கண்ட்வா நகரத்தில், வணக்கத்திற்குரிய துறவியான தாதாஜி துனிவாலே பாபாவின் பிரமாண்டமான நினைவுக்கோயில் அமைந்துள்ளது. தாதாஜி துனிவாலே தாம் அல்லது தாதா தர்பார் என்று அழைக்கப்படும் இப்புனிதத் தலத்தில், தாதாஜி துனிவாலே மகாராஜ் மற்றும் அவருடைய சீடரான சோட்டே தாதாஜி ஆகியோரின் சமாதிகள் அமைந்துள்ளன. தாதாஜி துனிவாலே அற்புதங்கள் செய்யும் துறவியாகப் போற்றப்பட்டார்; இன்றளவும் அவருடைய திவ்ய அற்புதங்களைத் தாம் தொடர்ந்து அனுபவித்து வருவதாகப் பக்தர்கள் உறுதியாக நம்புகின்றனர். இக்கோயிலில், அவரது தெய்வீகப் பிரசன்னத்தின் குறியீடாகக் கருதப்படும் அணையாத புனித நெருப்பு (துனி), இரவும் பகலும் தொடர்ச்சியாக எரிந்து கொண்டே இருக்கிறது.

துனிவாலே பாபாவின் ஆரம்பகால வாழ்க்கையைப் பற்றி மிகக் குறைவாகவே தகவல்கள் அறியப்படுகின்றன. இவரது இயற்பெயர் சுவாமி கேஷவானந்த் மகாராஜ் என்பதாகும், இவர் ‘படே தாதாஜி’ என்றும் அழைக்கப்பட்டார். அவர் செல்லும் இடங்களிலெல்லாம் புனித நெருப்பை (துனி) மூட்டி தியானத்தில் மூழ்கி விடுவார் என்று கூறப்படுகிறது. இந்த வழக்கத்தின் காரணமாகவே மக்கள் அவரை ‘துனிவாலே பாபா’ என்று அழைக்கத் தொடங்கினர். அவர் நரசிங்பூர் மாவட்டத்தில் உள்ள சாய்கேடாவில் சுமார் முப்பது ஆண்டுகள் வசித்தார். அங்கு அவர் தங்கியிருந்த காலத்தில், அவரது அருளால் மக்கள் நோய்களிலிருந்து விடுபட்ட அற்புதப் பிணிதீர்ப்புகள் குறித்த பல கதைகள் கூறப்படுகின்றன. அவர் கொண்டைக்கடலை மற்றும் பருப்பு வகைகளை தங்கம் மற்றும் வெள்ளியாக மாற்றினார் என்றும், நோயாளிகளைக் குணப்படுத்தினார் என்றும், பார்வையற்றோருக்கு பார்வையை மீட்டுத் தந்தார் என்றும் நம்பப்படுகிறது. 1930 இல் இறுதியாக கண்ட்வாவுக்கு வருவதற்கு முன்பு, அவர் கர்கோன் மாவட்டத்தில் உள்ள பத்வா என்ற இடத்தில் சிறிது காலம் தங்கியிருந்தார்.

கண்ட்வாவுக்கு வந்த சில நாட்களிலேயே, மார்கசீர்ஷ சுக்ல திரயோதசி நாளான 1930 டிசம்பர் 3 அன்று, அவர் மகாசமாதி அடைந்தார். அந்த இடத்திலேயே அவரது பக்தர்கள் பின்னர் ‘தாதா தர்பார்’ அமைத்தனர். அவர் மறைந்த உடனே, ஒரு புனித நெருப்பு அவரது சமாதிக்கு அருகில் மூட்டப்பட்டது; அன்றிலிருந்து அந்த நெருப்பு இடைவிடாமல் எரிந்து கொண்டிருக்கிறது. இவரது சீடரான சோட்டே தாதாஜி மகாராஜ், ராஜஸ்தானில் உள்ள திண்ட்வானா கிராமத்தைச் சேர்ந்தவர்; இவரது இயற்பெயர் பூரிலால் என்பதாகும். இளம் வயதிலேயே பெற்றோரை இழந்த இவர், ஒரு குருவைத் தேடிப் புறப்பட்டார். அந்தத் தேடலின் போது, படே தாதாஜியின் பெரும் புகழைக் கேள்விப்பட்டு, இறுதியாக சாய்கேடாவில் அவரைச் சந்தித்தார். படே தாதாஜி இவருக்கு ‘ஹரிஹரானந்த்’ என்று பெயரிட்டார்; காலப்போக்கில் மக்கள் இவரை ‘சோட்டே தாதாஜி’ என்று அழைக்கத் தொடங்கினர். 1942 பிப்ரவரி 5 ஆம் தேதி, பல்குன சுக்ல பஞ்சமி அன்று, பிரயாக்ராஜில் நடைபெற்ற கும்பமேளாவின் போது அவர் சமாதியடைந்தார். பின்னர் அவரது உடற்பகுதிகள் கண்ட்வாவுக்குக் கொண்டுவரப்பட்டு, அவரது குருவின் சமாதிக்கு அருகிலேயே ஒரு சமாதி கட்டப்பட்டது.

கண்ட்வாவில் பரந்த நிலப்பரப்பில் பரவியுள்ள தாதா தர்பார் வளாகம், உயரமான எல்லைச் சுவர்களால் சூழப்பட்டுள்ளது; அதனுள் விசித்திரமான மற்றும் தனித்துவமான வடிவமைப்பு கொண்ட பல பிரமாண்டமான நுழைவு வாயில்கள் உள்ளன. உள் முற்றம் கல் ஓடுகளால் நேர்த்தியாகப் பாவப்பட்டுள்ளது. இதன் மையத்தில் படே தாதாஜியின் வட்ட வடிவ, இரு அடுக்கு சமாதி கோயில் நிற்கிறது; இதன் கூரையில் ஒரு கோபுரம் (கும்பம்), ஆமலக அமைப்பு மற்றும் தங்கக் கலசம் ஆகியவை அமைந்துள்ளன. இதன் அருகில் சோட்டே தாதாஜியின் சதுர வடிவ சமாதி கோயில் உள்ளது; இதன் கூரையின் நான்கு பக்கங்களிலும் உயரமான கூம்பு வடிவ சிகரங்கள் அலங்கரிக்கின்றன.

படே தாதாஜியின் கோயிலுக்கு வெளியே புனித துனி அமைக்கப்பட்டுள்ள ஒரு பெரிய மண்டபம் உள்ளது; இது ஆண்டின் அனைத்து நாட்களிலும் இடைவிடாது எரிந்து கொண்டிருக்கிறது. அதற்கு எதிரே சமாதி சந்நிதியின் பிரமாண்ட நுழைவாயில் உள்ளது. உள்ளே, சுவர்களில் தாதாஜி மகாராஜின் உருவப்படங்கள் அலங்கரிக்கப்பட்டுள்ளன. மையத்தில், ஒரு சிறிய மண்டபத்தின் கீழ் துணியால் மூடப்பட்ட சமாதி அமைந்துள்ளது. ஆரத்தியின் போது, சமாதிக்கு நைவேத்தியங்களும் அபிஷேகங்களும் செய்யப்படுகின்றன; புனிதமான சரணாமிர்தம் வெளியே உள்ள ஒரு தொட்டியில் வழிகிறது, அங்கிருந்து பக்தர்கள் அதைச் சேகரித்துக் கொள்கிறார்கள். சற்றே தொலைவில் சோட்டே தாதாஜியின் சமாதி கோயில் நவீன பாணியில், உயரமான வளைவுகள், பெரிய ஜன்னல்கள் மற்றும் ஈர்க்கக்கூடிய நுழைவாயிலுடன் கட்டப்பட்டுள்ளது. மையத்தில் அவரது சமாதி உள்ளது; முதல் சந்நிதியைப்போலவே, பக்தர்களுக்காக வெளியேயும் ஒரு சரணாமிர்தத் தொட்டி அமைந்துள்ளது.

இந்த முதன்மைச் சந்நிதிகளைத் தவிர, இக்கோயில் வளாகத்தில் நர்மதா தேவிக்கு அர்ப்பணிக்கப்பட்ட ஒரு கோயிலும் உள்ளது. படே தாதாஜி மற்றும் சோட்டே தாதாஜி இருவருமே நர்மதா தேவியின் தீவிர பக்தர்களாக இருந்தனர். பளிங்கு பீடத்தின் மீது அழகாகப் பிரதிஷ்டை செய்யப்பட்டுள்ள அத்தேவியின் சிலை இக்கோயிலை அலங்கரிக்கிறது. சமாதி சந்நிதிகளுக்குப் பின்னால் ‘அமுல்ய தர்ஷன்’ என்ற கட்டிடம் உள்ளது; அங்கு படே தாதாஜி மற்றும் சோட்டே தாதாஜி பயன்படுத்திய பொருட்கள் காட்சிப்படுத்தப்பட்டுள்ளன. இவற்றில் அவர்களுடைய சிம்மாசனம், தண்டு (கோல்), சட்டை மற்றும் கிராமபோன் ஆகியவையும் அடங்கும். மேலும் 1920–1930 காலப்பகுதியைச் சேர்ந்த ஃபோர்டு (Ford) மற்றும் பிளைமவுத் (Plymouth) கார்கள், மற்றும் பாரம்பரிய குதிரை வண்டி ஆகியவற்றை பக்தர்கள் காணலாம்; இவை அனைத்தும் பக்தர்களால் தாதாஜிக்கு பரிசளிக்கப்பட்டவையாகும். கோயில் வளாகத்தில் ‘சோட்டா பண்டார்’ மற்றும் ‘படா பண்டார்’ என இரண்டு சமையலறைகள் உள்ளன. சிறிய சமையலறையில் தினசரி நிவேதனங்களும் தேநீரும் தயாரிக்கப்படுகின்றன; பெரிய சமையலறை திருவிழா காலங்களில் பிரமாண்டமான அன்னதான விருந்துகளை சமைக்கப் பயன்படுகிறது. மேலும், நர்மதா பரிக்ரமா மேற்கொள்ளும் பக்தர்கள் மற்றும் துறவிகளுக்கு தினமும் உணவுக்கு ஏற்பாடு செய்யப்படுகிறது. இக்கோயில் ஒரு தர்மசாலையையும் ஒரு கோசாலையையும் பராமரித்து வருகிறது.

தாதா தாம் இரவும் பகலும் எந்நேரமும் பக்தர்களுக்காகத் திறந்திருக்கும். இங்கு கொண்டாடப்படும் மிகக் கோலாகலமான பண்டிகை குரு பூர்ணிமா ஆகும். படே தாதாஜி சமாதியடைந்த அடுத்த ஆண்டான 1931 முதல், இக்கொண்டாட்டம் ஈடு இணையற்ற பக்திப் பெருக்குடன் நடத்தப்பட்டு வருகிறது; இதில் லட்சக்கணக்கான பக்தர்கள் கலந்துகொள்கின்றனர். மகாராஷ்டிராவைச் சேர்ந்த யாத்ரீகர்கள் பெரும்பாலும் தீப்பந்த ஏந்தி ஊர்வலமாக வருகிறார்கள். இக்காலக்கட்டத்தில் வளாகம் முழுவதுமே ஒரு பெரிய திருவிழாச் சந்தையாக மாறுகிறது. தீபாவளியும் மிகுந்த உற்சாகத்துடன் கொண்டாடப்படுகிறது; அப்போது வளாகம் முழுவதும் மலர்களால் அலங்கரிக்கப்பட்டு, சுமார் 150 டின் எண்ணெய் பயன்படுத்தப்பட்டு தீபங்களால் ஒளியேற்றப்படுகிறது.

வரும் ஆண்டுகளில், இக்கோயில் ஒரு பிரமாண்டமான புனரமைப்புக்குத் தயாராகி வருகிறது. சுமார் 100 கோடி ரூபாய் மதிப்பில், ராஜஸ்தானின் வெள்ளை மக்ரானா பளிங்குக் கல்லால் ஆன ஒரு பிரமாண்ட புதிய கோயில் இங்கு கட்டப்படவுள்ளது. புதிய கோயில் 108 தூண்களைக் கொண்டு, 101 அடி உயரத்திற்கு எழுப்பப்படும். இதன் அடிக்கல் நாட்டு விழா 2025 ஜூன் 30 அன்று நடைபெற்றது; இதில் துறவிகள், பக்தர்கள், மத்திய மற்றும் மத்தியப் பிரதேச மாநில அமைச்சர்கள் கலந்துகொண்டனர். அந்தப் புனிதமான நாளில், மாலையில் முதலமைச்சரே நேரில் வந்து மலரஞ்சலி செலுத்தினார்.

பயனுள்ள தகவல்கள்

• கண்ட்வா புதிய பேருந்து நிலையத்திலிருந்து 500 மீட்டர் தொலைவில் அமைந்துள்ளது
• மாநிலத்தின் பல நகரங்களில் இருந்து கண்ட்வாவுக்கு வழக்கமான அரசுப் பேருந்து சேவைகள் உள்ளன
• தனியார் வாகனங்கள் திருக்கோயில் வாகன நிறுத்துமிடம் வரை செல்லலாம்
• வளாகத்தினுள் பல்வேறு தங்குமிட மற்றும் உணவு வசதிகள் உள்ளன
• தொடர்புக்கு : திருக்கோயில் அலுவலகம், கைபேசி. 0733-2243108; பக்த நிவாஸ், கைபேசி. 9617306134
• திருக்கோயில் அமைவிடம் : https://maps.app.goo.gl/xijzsBK3baQgmq6D7