காட்டன்தேவி கோவில்

ஆவல்கேட், தாலுகா. இகத்புரி, மாவட்டம். நாசிக்

மும்பை-நாசிக் நெடுஞ்சாலையில் உள்ள கசாரா எனும் தள கணவாயில் (தள காட்) ஸ்ரீ காட்டன்தேவி கோவில் அமைந்துள்ளது. இக்கோவிலுக்கு வைதிக காலத்திலிருந்தே நீண்ட வரலாறு உண்டு. சஹயாத்ரி மலைத்தொடரின் உச்சியில் ஹரிஹர், துர்வர், உன்டவட் மற்றும் த்ரயம்பக் ஆகிய சிகரங்களின் சூழலில், த்ரிங்கல்வாடி கோட்டைக்கு அருகில் இக்கோவில் அமைந்துள்ளது. ‘ஸ்ரீ துர்கா சப்தசதி’ என்னும் நூலில் துர்கா தேவியின் ஒன்பது ரூபங்களின் மாஹாத்பியம் விவரிக்கப்பட்டுள்ளது. அதில் சைலபுத்ரி, பிரம்மசாரிணி, காளராத்திரி, மஹாகிரி, மஹாசித்தி, மஹாகௌரி, ரித்தி, சித்தி, துர்கா ஆகிய வடிவங்கள் அடங்கும். காட்டன்தேவி ‘சைலபுத்ரி’ வடிவத்தில் விளங்கும் தேவி ஆவாள். வஜிரேஸ்வரியிலிருந்து பீமாசங்கரத்திற்குப் புறப்பட்டுச் செல்லும்போது, தேவி இளைப்பாறுவதற்காக இத்தலத்தைத் தேர்ந்தெடுத்தாள் என்பது கோவிலின் தலபுராணமாகும். மலைகளின் மீது கொண்ட அன்பினால், மலைமடியில் இயற்கை எழில் கொஞ்சும் இடமாக விளங்கிய இது தேவிக்கு மிகவும் பிடித்துப்போக, அங்கேயே ஸ்ரீ காட்டன்தேவி வடிவில் நிலைபெற்றாள். துர்கையின் முதல் வடிவம் ‘சைலபுத்ரி’ என்று அழைக்கப்படுகிறது. இத்தேவி நவதுர்கைகளில் முதல் துர்கையாகக் கருதப்படுகிறாள். நவராத்திரியின் முதல் நாளில் இத்தேவிக்கு சிறப்பு பூஜையும் ஆராதனையும் செய்யப்படுகின்றன. இமயமலையின் அரசனான ஹிமவானின் புதல்வி என்பதாலும், மலைத்தொடர்கள் மீது பிரியம் கொண்டவள் என்பதாலும் இவள் ‘ஹிமாவதி’ என்றும் போற்றப்படுகிறாள்.

சத்ரபதி சிவாஜி மஹாராஜ் கல்யாண் கருவூலத்தைக் கைப்பற்றித் திரும்பும்போது, வழியில் ஒரு பள்ளத்தாக்கை அடைந்தார் என்று கூறப்படுகிறது. கருவூலத்தைச் சுமந்து வந்த ஒட்டகங்கள் அங்கு அவிழ்த்து விடப்பட்டதால், அவ்விடம் ‘ஒட்டகப் பள்ளத்தாக்கு’ (உண்ட்தரி) என்று அழைக்கப்படலாயிற்று. இந்த ஒட்டகப் பள்ளத்தாக்கில்தான் பாட்சா நதியும் உற்பத்தியாகிறது. ஒட்டகப் பள்ளத்தாக்கிற்கு அருகில் காட்டன்தேவி கோவில் உள்ளது. சிவாஜி மஹாராஜாவால் கொண்டுவரப்பட்ட கருவூலம் இக்கோவிலில்தான் எண்ணிச் சரிபார்க்கப்பட்டது. அந்நேரத்தில் மஹாராஜ் காட்டன்தேவிக்கு முறைப்படி சாஸ்திரோக்தமாக பூஜை செய்தார் என்று வரலாற்றுச் சான்றுகள் கூறுகின்றன. எனவேதான் இக்கோவிலுக்கு வரலாற்றுச் சிறப்பும் கிடைத்துள்ளது.

கோவிலுக்குச் செல்லும்போது ஒரு முகப்பு வளைவு உள்ளது; அதன் நடுவில் கணபதியின் திருவுருவம் செதுக்கப்பட்டுள்ளது. கோவிலுக்குள் நுழையும் போது இருபுறமும் இரண்டு சிம்ம சிலைகள் உள்ளன. நான்கு பக்கமும் வட்ட வடிவக் குவிமாடத்தைக் கொண்டு, முற்றிலும் மூடப்படாமல் இருக்கும் கோவிலின் திறந்தவெளி மண்டபம் தனித்துவமானது. கருவறையில் வீற்றிருக்கும் வெண் பளிங்குக்கல்லாலான தேவியின் விக்கிரகம் பிரசன்னமாகவும் தேஜோமயமாய் ஒளிர்கிறது. சிங்கத்தின் மீது வீற்றிருக்கும் இத்தேவி அஷ்டபுஜங்கள் (எட்டு கரங்கள்) கொண்டவள். அவளது ஒவ்வொரு கரத்திலும் ஆயுதம் உள்ளது. வலது கரத்தில் திரிசூலமும், இடது கரத்தில் தாமரை மலரும் ஏந்தியிருக்கிறாள். இந்த விக்கிரகத்தின் திருவடிகளுக்கு அருகில் ‘தாண்ட்ளா’ வடிவிலான (சிந்தூரம் பூசப்பட்ட, குறிப்பிட்ட வடிவமில்லாத, முக்கிய உறுப்புகள் மட்டும் சித்தரிக்கப்பட்ட பாறை வடிவம்) சுயம்பு விக்கிரகமும் உள்ளது. இதுவே தேவியின் மூல வடிவமாகும்.

அங்கிருந்து சற்றுத் தொலைவில் மூல காட்டன்தேவி கோவில் அமைவிடம் உள்ளது. அடர்ந்த மரங்களின் மத்தியில் சூழ்ந்துள்ள ஒரு சிறிய கோவில் இது. அங்கு தேவியின் கருவறைக்கு எதிரே, நந்தியின் இருப்பிடத்தைப் போலப் பெரிய சிம்ம விக்கிரகம் உள்ளது. மலைச்சாரல்கள், பள்ளத்தாக்குகள் மற்றும் அடிவானம் வரை நீளும் மலைத்தொடர்களால் இந்தச் சூழல் மனதிற்கு அமைதியையும் இன்பத்தையும் தருகிறது.

இத்தேவி ஆத்மஞானத்தை வளர்ப்பவளுமாவாள். ஆத்மஞானத்தைப் பெறத் தூண்டுபவள் என்ற முறையில் உள்ளூர் மக்கள் இத்தேவியின் மீது அளப்பரிய நம்பிக்கை வைத்துள்ளனர். தேவியின் அருளால் ஊருக்கு எந்த ஆபத்தும் வருவதில்லை என்றும், சாலைகளில் விபத்துகள் நேர்வதில்லை என்றும் உள்ளூர் மக்கள் நம்புகின்றனர். குழந்தைகளுக்கு முடிகாணி கொடுத்தல், சத்தியநாராயண பூஜை, துர்கா சப்தசதி பாராயணம் மற்றும் பிற ஆன்மீக நூல்களின் பாராயணங்கள் போன்ற நிகழ்வுகள் இக்கோவிலில் நடைபெறுகின்றன. இத்தேவி பக்தர்கள் வேண்டிப் பிரார்த்திக்கும் நேர்த்திக்கடன்களை நிறைவேற்றுபவள் என்பது ஐதீகம். அதனால் தேவிக்கு நேர்த்திக்கடன் நேர்ந்து, அது நிறைவேறியவுடன் பித்தளை மணியைச் சமர்ப்பிக்கும் வழக்கம் உள்ளது. எந்தவொரு சுபகாரியத்தையும் தொடங்குவதற்கு முன் தேவிக்குத் தேங்காய் உடைத்து அருள் பெறுகின்றனர்.

இகத்புரி தாலுகாவின் கிராமதேவதையாக ஸ்ரீ காட்டன்தேவி போற்றப்படுகிறாள். இது ஒரு வரப்ரசாதியான தேவஸ்தானம் என்பதால், தினமும் நூற்றுக்கணக்கான பக்தர்கள் தரிசனத்திற்காக இங்கு வருகின்றனர். நவராத்திரி உற்சவத்தின் ஒன்பது நாட்களும் இங்குப் பெரிய திருவிழா நடைபெறுகிறது. மஹாநவமி மற்றும் விஜயதசமி நாட்களில் இங்கு பக்தர்கள் கூட்டம் அதிகமாக இருக்கும். இக்கோவில் 1980 ஆம் ஆண்டு ஜீர்ணோத்தரணம் செய்யப்பட்டது.

பயனுள்ள தகவல்கள்:

• கசாரா இரயில் நிலையத்திலிருந்து 16 கி.மீ,
• நாசிக்கிலிருந்து 45 கி.மீ தொலைவில் உள்ளது
• நாசிக் மற்றும் இகத்புரியிலிருந்து பேருந்து வசதி உண்டு
• தனியார் வாகனங்கள் நேரடியாகக் கோவில் வரை செல்ல முடியும்
• கோவில் வளாகத்தில் தங்கும் வசதி இல்லை